Wed07272016

Last updateThu, 28 Jul 2016 1am

Back You are here: Home Recipes விளையாட்டு/பொது மற்றயவை ஆஸ்திரேலிய ஒபன் டென்னிஸ் முதல் சுற்றில் நடால் அதிர்ச்சி தோல்வியடைந்தார்

ஆஸ்திரேலிய ஒபன் டென்னிஸ் முதல் சுற்றில் நடால் அதிர்ச்சி தோல்வியடைந்தார்

ஆஸ்திரேலியாவின் மெல்போர்ன் நகரில், நடப்பு ஆண்டின் முதல் கிராண்ட்ஸ்லாம் தொடரான ஆஸ்திரேலிய ஓபன் டென்னிஸ் தொடர் நடக்கிறது. இதன் ஆண்கள் ஒற்றையர் பிரிவு முதல் சுற்றில் ‘நம்பர்–5’ வீரரான ஸ்பெயினின் நடால், தரவரிசையில் 45வது

இடத்திலுள்ள சக வீரரான வெர்டாஸ்கோவை சந்தித்தார்.

‘டை–பிரேக்கர்’ வரை சென்ற முதல் செட்டை 6–7 என இழந்த நடால், அடுத்த இரண்டு செட்டையும் 6–4, 6–3 என கைப்பற்றினார். பின், நான்காவது செட்டை 7–6 என தன்வசப்படுத்தி வெர்டாஸ்கோ பதிலடி தந்தார். வெற்றியாளரை நிர்ணயிக்கும் கடைசி செட்டில் ஒரு கட்டத்தில், நடால் 2–0 என முன்னிலை வகித்தார். இதன் பின், துடிப்பாக செயல்பட்ட வெர்டாஸ்கோ தொடர்ந்து ‘கேமை’ கைப்பற்றி 6–2 என தன்வசப்படுத்தினார். 4 மணி நேரம் 41 நிமிடம் நீடித்த போட்டியின் முடிவில், நடால் 6–7, 6–4, 6–3, 6–7, 2–6 என்ற செட் கணக்கில் அதிர்ச்சி தோல்வியடைந்தார்.

முர்ரே முன்னேற்றம்:

மற்றொரு முதல் சுற்றில் பிரிட்டனின் ஆன்டி முர்ரே, தரவரிசையில் 83வது இடத்திலுள்ள ஜெர்மனியின் அலெக்சாண்டர் சிவ்ரவை சந்தித்தார். இதில் சிறப்பாக விளையாடிய முர்ரே 6–1, 6–2, 6–3 என்ற நேர் செட் கணக்கில் வெற்றி பெற்றார்.

வாவ்ரின்கா வெற்றி:

மற்றொரு போட்டியில் சுவிட்சர்லாந்தின் வாவ்ரின்கா, ரஷ்யாவின் டிமிட்டிரியை எதிர் கொண்டார். முதலிரண்டு செட்டை 7–6, 6–3 என கைப்பற்றினார் வாவ்ரின்கா. பின் டிமிட்டிரி காயத்தால் வெளியேற, வாவ்ரின்கா வெற்றி பெற்றதாக அறிவிக்கப்பட்டார்.

இவானோவிச் அசத்தல்:

பெண்கள் ஒற்றையர் முதல் சுற்றில் செர்பியாவின் இவானோவிச், ஆஸ்திரேலியாவின் டாம்மி பேட்டர்சனை 6–2, 6–3 என்ற நேர் செட் கணக்கில் வென்றார். மற்ற போட்டிகளில் பெலாரசின் அசரன்கா, ஸ்பெயினின் முகுருஜா, செர்பியாவின் ஜான்கோவிச், ஜெர்மனியின் கெர்பர், சபைன் லிசிக்கி உள்ளிட்டோர் வெற்றி பெற்று அடுத்த சுற்றுக்கு முன்னேறினர்.

வீனஸ், ஹாலப் தோல்வி:

மற்றொரு போட்டியில், ‘நம்பர்–10’ வீராங்கனை அமெரிக்காவின் வீனஸ் வில்லியம்ஸ், தரவரிசையில் 47வது இடத்திலுள்ள ஆஸ்திரேலியாவின் ஜோகன்னாவை சந்தித்தார். இதில் போராடிய வீனஸ் 4–6, 2–6 என்ற நேர் செட் கணக்கில் வீழ்ந்தார்.

* ‘நம்பர்–2’ வீராங்கனையான ருமேனியாவின் சிமோனா ஹாலப், தகுதிச்சுற்று மூலம் முன்னேறிய சீனாவின் சூய் ஜாங்கை எதிர் கொண்டார். ஒரு மணி நேரம் 18 நிமிடம் பேராடிய ஹாலப் 4–6, 3–6 என்ற நேர் செட் கணக்கில் தோல்வியடைந்தார்.

2014

பதினான்கு கிராண்ட்ஸ்லாம் பட்டம் வென்ற நடால், சமீப காலமாக சொதப்புகிறார். கடைசியாக கடந்த 2014 பிரெஞ்ச் ஓபனில் பட்டம் வென்றார்.  பின் எந்தவொரு கிராண்ட்ஸ்லாம் தொடரிலும் கோப்பை கைப்பற்றவில்லை. 

முதல் முறை

ஆஸ்திரேலிய ஓபன் தொடரில், முதல் முறையாக நடால் முதல் சுற்றுடன் வெளியேறியுள்ளார். ஒட்டுமொத்த டென்னிஸ் வாழ்க்கையில், இரண்டாவது முறையாக கிராண்ட்ஸ்லாம் தொடரின் முதல் சுற்றுடன் நடையைக்கட்டினார். இதற்கு முன், கடந்த 2013ல் விம்பிள்டன் தொடரின் முதல் சுற்றில் பெல்ஜியத்தின் ஸ்டீவ் டார்சியசிடம் தோல்வியடைந்தார்.

பழி தீர்த்தார்

கடந்த 2009 ஆஸ்திரேலிய ஓபன் அரையிறுதியில் நடால், வெர்டாஸ்கோ மோதினர். இதன் 5 செட்களில் ஆக்ரோஷம் காட்டிய நடால் வெற்றி பெற்றார். இந்த தோல்விக்கு, நேற்று பெர்னான்டோ பழி தீர்த்தார்.

மகிழ்ச்சி

 வெர்டாஸ்கோ கூறுகையில்,‘‘ நடாலுக்கு எதிரான போட்டியின் கடைசி செட்டில், நம்ப முடியாத அளவுக்கு செயல்பட்டேன். இதில் வெற்றி பெற்றது மகிழ்ச்சி அளிக்கிறது,’’ என்றார்.

கடினமான நாள்

நடால் கூறுகையில்,‘‘ நேற்றைய போட்டி எனக்கான நாளாக அமையவில்லை. தோல்வியை ஏற்றுக் கொள்வது கடினமாகத்தான் உள்ளது. இதிலிருந்து மீண்டு வர கடின பயிற்சியில் ஈடுபடுவதை தவிர வேறு வழியே இல்லை,’’ என்றார்.

வெயில் தாக்கம்

ஆண்கள் ஒற்றையர் பிரிவு முதல் சுற்றில் அர்ஜென்டின வீரர் தியாகோ ஷிவ்டஸ்மேன், ஆஸ்திரேலியாவின் ஜான் மில்மேனை சந்தித்தார். முதலிரண்டு செட்டில் தியாகோ வென்றார். மூன்றாவது செட்டை ஜான் கைப்பற்றினார். நான்காவது செட்டில் ஜான் 5–0 என்ற புள்ளி அடிப்படையில் முன்னிலை இருந்தார். திடீரென, வெயிலின் கொடுமையை தாங்க முடியாத தியாகோவால், தொடர்ந்து விளையாட முடியவில்லை. உடனடியாக ‘ஸ்டிரெச்சர்’ வரவழைக்கப்பட்டு, அழைத்து செல்லப்பட்டார். முடிவில், ஜான் வெற்றி பெற்றதாக அறிவிக்கப்பட்டது.

மெல்போர்னில் 33 ‘டிகிரி’ செல்சியஸ் வெப்பம் பதிவானதால், பல நட்சத்திரங்கள் பாதிக்கப்பட்டனர்.