Fri08222014

Last update12:42:47 AM

Font Size

Profile

Menu Style

Cpanel
Back செய்திகள் செய்திகள் கனடா மாவீரர்களை மறவாது பூசிப்போம்!- அனலை நிதிஸ் ச. குமாரன்

மாவீரர்களை மறவாது பூசிப்போம்!- அனலை நிதிஸ் ச. குமாரன்

மூன்று வருடங்களுக்கு முன்னர் நான்காம் கட்ட ஈழப் போர் முடிவுற்றாலும், விடுதலைப் புலிகளின் பலம் களத்தில் ஓங்கியிருந்த வேளையில் மாவீரரை வணங்கும்

நிகழ்வுகள் சிறப்பாக இடம்பெற்றது போன்று இந்த வருட மாவீரர் வார நிகழ்வுகள் தாயகத்தில் இல்லாவிட்டாலும் தமிழகம் உள்ளிட்ட தமிழர்கள் வாழும் அனைத்து நாடுகளிலும் சிறப்பாக இடம்பெறுவது தமிழர்கள் தமக்காகப் போரிட்டு இறந்த மாவீரர்களை மறக்க மாட்டார்கள் என்பதனையே எடுத்துக் காட்டுகிறது.

இந்த வருட மாவீரர் வார நிகழ்வுகள் வெகு சிறப்பாக நடைபெற தமிழர்கள் வாழும் அனைத்து நாடுகளிலும் ஒழுங்குகள் செய்யப்பட்டுள்ளன. 2009-ஆம் ஆண்டிலிருந்து இடம்பெறும் மாவீரர் வார நிகழ்வுகள் பல்வேறு குழப்பமான சூழ்நிலையிலேயே இடம்பெற்று வந்துள்ளன.

தமிழர் வாழும் நாடுகளில் இயங்கும் அமைப்புக்களைத் தனது வலையில் சிக்க வைத்துக் குளிர்காயும் வேலைகளையே சிங்கள ஏகாதிபத்திய அரசு தனது தூதரகங்கள் மூலமாகச் செய்தது. இருந்த போதிலும், மாவீரர் வார நிகழ்வுகள் தடங்கல் இன்றியே இடம்பெற்றன.

யார் எத்தனை சூழ்ச்சிகளைச் செய்தாலும் தமிழர்கள் தமக்காகப் போரிட்டு இறந்தவர்களைப் பூசிப்பதற்குப் பின்னிற்கவில்லை.

தாயகத்தில் வாழும் மக்கள் பல்வேறு விதமான கட்டுப்பாடுகளுக்கு மத்தியிலும் மாவீரர்களை வணங்க ஏதோ ஒரு வழியில் தம்மால் இயன்றவற்றைச் செய்தாலும், புலம்பெயர் நாடுகளில் இடம்பெறும் நிகழ்வுகள் மிக விமரிசையாகவே இடம்பெற்று வருகின்றன.

முன் எப்போதும் இல்லாதவாறு மாவீர்களுக்கு புலம் பெயர் நாடுகளில் வதியும் தமிழர்கள், தமிழகத் தமிழர்கள், மலேசியத் தமிழர்கள், தென் ஆபிரிக்கத் தமிழர்கள் என உலகெங்கும் வாழும் தமிழர்கள் தமது வீர வணக்கங்களை இந்த வருடம் செய்யத் தயாராகி வருகிறார்கள்.

இந்த வருட மாவீரர் வார நிகழ்வுகள் பல்வேறு சோதனைகளையும், சாதனைகளையும் கண்டுகொண்டிருக்கும் ஆண்டில் இடம்பெறுகிறது என்றால் மிகையாகாது.

சோதனை ஆண்டு

ஒரு இலட்சத்துக்கும் அதிகமான இராணுவத்தினரை வடக்கு மற்றும் கிழக்குப் பகுதிகளில் தங்க வைத்துள்ளதாக நம்பகரமான தகவல்கள் கூறுகின்றன.

மேலும் இந்த ஆண்டானது பல்வேறு சோதனைகளைத் தழுவிய ஆண்டாகத் தமிழர்களுக்கு இருக்கிறது. வடக்கு கிழக்குப் பகுதிகளில் சிங்கள ஆக்கிரமிப்புப் படையினர் பல்வேறு விதமான மனித உரிமை மீறல்களைச் செய்வதுடன், தமிழ் மக்களைப் பல்வேறு விதமான வன்புணர்வுக்கு ஆளாக்கி வருகின்றனர்.

மாவீரர்களைப் புதைத்த கல்லறைகளைக் கூட சிங்களம் விட்டு வைக்கவில்லை. மாவீரர்களின் எந்தவொரு அடையாளச் சின்னத்தையும் இல்லாமல் செய்து விடுவதில் சிங்களப் பேரினவாதம் வெற்றி கண்டுள்ளது.

தமிழ் நிலங்களில் பௌத்த விகாரைகளை நிறுவி தமிழர்களின் மத அடையாளங்களை அழிக்கும் வேலைகளைச் செய்கிறது சிங்களம்.

தமிழர்களை அவர்களின் குடியிருப்புக்களுக்குச் செல்ல அனுமதிக்காமல் சிங்கள மக்களைக் குடியேற்றும் வேலைகளையே செய்து வருகிறது மகிந்தவின் இன அழிப்பு ஆட்சி.

மூன்று வருடங்களாக முள்வேலி முகாம்களுக்குள் அடைபட்டிருந்த தமிழ் மக்கள் தற்போது திறந்த வெளிச் சிறைக்குள் வாழும் துர்ப்பாக்கிய நிலையே காணப்படுகிறது.

தமிழ் இளைஞர் மற்றும் யுவதிகளைப் பல்வேறு விதமான இம்சைகளுக்கு ஆளாக்கி அவர் தம் எதிர்காலத்தை அநியாயமாக அழித்து வருகிறது சிங்களம்.

தமிழ்ப் பெண்களைத் திருமணம் செய்வது என்கிற போர்வையில் தமிழ்ப் பண்பாட்டுக்கே ஒவ்வாத காரியங்களைச் செய்கின்றனர் சிங்களச் சிப்பாய்கள்.

இவைகள் அனைத்துக்கும் துணை போகின்றன தமிழ் ஒட்டுக் குழுக்கள்.

சிங்கள அரசு தமிழர் தாயகப் பகுதிகளில் ஆதிக்கத்தைச் செலுத்தி தமிழ் மக்களை சத்தம் சஞ்சாரம் இல்லாமல் இன அழிப்புக்கு உள்ளாக்கி வருகிறது.

தமிழீழத்தில் செய்யும் அட்டூழியம் போதாதென்று தமிழர்கள் புலம்பெயர்ந்து வாழும் நாடுகளிலும் நேரடியானதும் மறைமுகமானதுமான வேலைகளைச் செய்கிறது சிங்களம்.

இந்த வருடம் நவம்பர்8-ஆம் தேதியன்று விடுதலைப்புலிகளின் முன்னாள் தளபதியும் பின்னர் பிரான்ஸில் தமிழ் செயற்பாட்டாளராகவும் திகழ்ந்த பருதி பிரான்ஸின் தலைநகர் பாரிஸில் வைத்துச் சுட்டுக் கொலை செய்யப்பட்டார்.

இதைவிட பல்வேறு மறைவான செயற்பாடுகளைப் புலம்பெயர் தமிழர்கள் இடையே செய்து தமிழர்களுக்குள் பிளவை உண்டுபண்ணும் வேலையைச் செய்கிறது சிங்களம்.

சாதனை ஆண்டு

தமிழீழத்திற்காகத் தங்கள் இன்னுயிரை அர்ப்பணித்த மாவீரர்களைப் பூசிக்கும் இந்த நிகழ்வை முன் எப்போதும் இல்லாத அளவில் இந்த வருடம் கடைப்பிடித்து தமிழர்களை அழித்தொழிக்கக் கங்கணம் கட்டிச் செயற்படும் சிறிலங்கா அரசிற்குத் தகுந்த பாடம் கற்பிக்கத் தமிழினம் உறுதியேற்கும் தருணமிது.

முப்பது ஆண்டுகளுக்கு மேலான தமிழீழ ஆயுதப் போரில் 30,000-க்கும் அதிகமான மாவீரர்களைத் தமிழீழம் இழந்திருக்கிறது. இவர்களுடைய இழப்புக்கள் வீண் போகக் கூடாது.

இந்த வருடம் சர்வதேச அரங்கில் இடம்பெற்ற நிகழ்வுகளின் அடிப்படையில் இதை தமிழர்களுக்குரிய சாதனை ஆண்டாகவே கருத வேண்டும்.

ஆசிய, ஆபிரிக்க, ஐரோப்பிய,அமெரிக்க மற்றும் ஆஸ்திரேலியக் கண்டங்களில் இருக்கும் பல நாடுகள் தமிழீழத் தமிழர்களுக்காக வாதிட்டு சிங்கள அரசுக்கு எதிராக மனித உரிமை அமர்வில் வாக்களித்ததும் இந்த ஆண்டே.

மனித உரிமை மற்றும் போர்க்குற்றச் செயற்பாடுகளுக்காகச் சிங்கள அரச தலைவர்களும் மற்றும் இராணுவ அதிகாரிகளுமே பொறுப்பு என்கிற வகையில் குற்றங்களைச் சுமத்தி நீதியானதும் சர்வதேச சமூகத்தினால் நியமிக்கப்படும் விசாரணைக் குழுவினால் விசாரிக்கப்பட்டு மக்களுக்கு நீதி வழங்க வேண்டும் என்கிற குரலுக்கு அங்கீகாரம் கிடைத்ததும் இந்த ஆண்டே.

சிறிலங்காவுக்கு ஆதரவாக இதுவரை காலமும் செயற்பட்டு வந்த இந்திய அரசு முதன் முறையாக இந்த வருடத்திலேயே ஈழத் தமிழர்களுக்கு ஆதரவாகவும் சிங்கள அரசுக்கு எதிராகவும் வாக்களித்துள்ளது. இது மாவீரர் கண்ட கனவு பொய்க்கவில்லை என்பதனையே எடுத்துக் காட்டுகிறது.

சிங்கள அரசுக்கு நேரடியாகவும் மறைமுகமாகவும் ஆதரவளித்து வரும் இந்திய அரசுக்குத் தலையிடியைக் கொடுக்கக்கூடிய களம் தமிழகத்தில் திறக்கப்பட்டுள்ளது.

காங்கிரஸ் தவிர்ந்த தமிழகத்தின் அனைத்துக் கட்சியினரும் ஈழத் தமிழர்களுக்கு ஆதரவாகக் குரல் கொடுப்பதுடன் வெறும் பேச்சளவில் இல்லாமல் செயலில் இறங்கி வேலையாற்றும் பொறுப்பை ஏற்றுள்ளதும் இந்த ஆண்டிலேயே.

டெசோ என்கிற தமிழீழ ஆதரவு மாநாடுகளை நடத்தி, .நா. சபை சென்று கையளித்தனர் தி.மு.கவின் ஸ்டாலின் மற்றும் பாலு.

இந்திய மற்றும் பிரித்தானிய மூத்த அரசியல்வாதிகள் உட்படப் பல்வேறு தமிழ்ப் பேராளர்கள் கலந்து சிறப்பித்த மாநாடு பிரித்தானியாவின் பாராளுமன்ற வளாகத்தில் இடம்பெற்றதும் இவ்வாண்டே.

.நா. சபையின் நம்பிக்கையின்மை குறித்த அறிக்கை அதன் உள்ளக விசாரணையாளர்களினால் வெளிவந்து உலக நாடுகளின் மனக் கதவுகளைத் திறக்க வழி வகுத்ததும் இந்த ஆண்டே.

முன் கூறப்பட்ட தமிழ் மக்கள் மீது கட்டவிழ்த்துவிடப்பட்ட மனித உரிமை மீறல்களை .நாவின் உள்ளக அறிக்கை பகிரங்கப்படுத்தியுள்ளதுடன், 70,000-க்கும் அதிகமான மக்கள் இறந்ததாகப் புதிய தகவலை வெளியிட்டு சர்வதேச சமூகத்தைத் திகைப்புக்குள்ளாக்கியுள்ளது.

இவைகள் அனைத்தும் தமிழீழ விடுதலைக்கு வித்தான அனைவருக்கும் கிடைத்த வெற்றியே. இவைகள் அனைத்தும் உலகத் தமிழர்களின் விடா முயற்சியின் சாதனையே.

கடந்த 30 ஆண்டுகளுக்கு மேலான தமிழீழத் தனியரசை நிர்மாணிக்கும் ஆயுத வழியிலான போராட்டத்துக்கு விதையான மாவீரர்கள் என்றென்றும் போற்றப்பட வேண்டியவர்கள்.

இவர்கள் பட்ட துன்ப துயரங்களை எவராலும் இலகுவில் அறிந்து கொள்ள முடியாது.

சாவு தமதருகில் வந்தும் அதனுடன் போராடி விதையாகிப் போய் உலகத் தமிழர்கள் அனைவர் மனங்களிலும் நிரந்தரமான ஒரு இடத்தைப் பிடித்து வாழ்ந்து வருபவர்களே மரணித்த மாவீரர்கள்.

தமிழன் என்றொரு இனமுண்டு தனியே அதற்கொரு குணமுண்டுஎன்று உலகம் கூறும் வகையில் அனைத்துத் தமிழரையும் புகழ்ச்சியின் உச்சிக்கே கொண்டுபோய் விட்ட மாவீரர்களை மறவாது பூசிப்போமாக.

This e-mail address is being protected from spambots. You need JavaScript enabled to view it